mga tula...

Kalungkutan

Sa likod ng aking masasayang ngiti
Larawan ng kalungkuta'y aking ikinukubli
Bahagi ng nakaraang aking naranasan
Kung bakit ba'y patuloy akong binabalik-balikan

Mga luhang ayaw nang pumatak
Kirot sa puso dulot ay pangamba
Hanggang kailan kaya itong aking pagdurusa
Umaasa na lang sa bagong umaga

Katagumpayan

Sinikap kong patagin ang mga lubak
Unos ay sinuong, panganib ma'y nakaambang
Pati maanghang na salita aking tinaggap
Ganito ba talaga ang pag-abot ng pangarap?

Sa basbas ng Maylikha ako'y tumindig
Itinuloy ang laban nang walang inaasahan
Kumapit sa pangakong hindi Niya iiwan
Salamat sa tagumpay na aking nakamtan

Kasawian

Dugo't pawis aking ibinigay
Pati buhay, lubos na inialay
Ano pa ba ang kulang sa'king pagsisikap?
At hindi ko nakamtan aking pinapangarap

O anong sakit ang mabigo!
Daig pa ang sibat na itinarak sa'king puso
Saksi ang lahat sa dinanas kong paghihirap
Mailap na tagumpay sana naman ay mahagilap

Kaligayahan

Ngiti ang aking salubong sa bawat umaga
Sabay yakap sa buhay mula sa Kanya
Hindi ba't kay sarap ng Kanyang mga biyaya
Marahil ang "SALAMAT" ay kulang pa

Wala akong pangamba sa mga problema
Pagkat sa Kanya ako ay umaasa
Sa tamis ng buhay ako'y nagsasaya
Ligaya ang dulot, makapaglingkod lamang sa Kanya